సమ్మక్క సారక్క దేవతాద్వయ స్తుతి.

సమ్మక్క సారక్క దేవతాద్వయ స్తుతి.
తే.గీ.	శ్రీ రమా గిరి జాంశ విశేష మహిమ సంజనిత విత తామేయ శక్తి యుక్త దేవతా మతల్లు లయిరి గావ మాన వాలి సమ్మక్క! సారక్క! లనఁగ మీరు	1.
తే.గీ.	మానవత్వము  గనరాదు మాన్య లార! రాక్షసత్వము మితి మీఱె రమణు లార! ధరణి దయ లేదు నేఁడు సుంత జగదంబ లార! సమ్మక్క! సారక్క! రార ప్రోవ	2.
తే.గీ.	నీతి నియమమ్ము లన్నవి నేల రాలె హింస సెలరేఁగె శాంతమ్ము ధ్వంస మయ్యె నిజము కఱవాయె వెదకంగ జగదంబ లార! సమ్మక్క! సారక్క! రార ప్రోవ	3.
ఉ.	తూలఁగ భోగ భాగ్యములఁ దోరము కొందఱు భాగ్యవంతులై మూలుగు చుందు రాఁకలిని భూజను లన్యులు మూరి సంతతం బాలము లుండ విశ్వమున నాయము లక్కట మానవాలికిం జాలవు కూడు గుడ్డలకు సమ్మక! సారక! రార కావఁగన్	4.
చం.	తఱ చయి స్వార్థ చింతనము తద్ద చెలంగెను మర్త్య కోటిలోఁ దఱిఁగెను ధర్మ వర్తనము దాంతము శాంతము మిక్కుటమ్ముగన్ వెఱపు నశించెఁ బాపముల విత్త నిమిత్తపు టాశ రేఁగెఁ గ్ర చ్చఱఁ గరు ణాంతరంగముల సమ్మక! సారక! రార కావఁగన్	5.
మ.	అనురాగమ్ములు సన్నగిల్లినవి కోపావేశ మాత్సర్యముల్ దనరెన్ మిక్కుటమై కలిం నరులకున్ ధాత్రీతలం బం దహో కనమే భద్రత మానినీ మణులకుం గామాంధు లుండంగ స జ్జన కోటిం గరుణార్ద్ర దృష్టిఁ గనరా సమ్మక్క సారక్కలూ	6.
కం.	మ్రొక్కెద మింపుగ మీరే దిక్కిల శరణాగతులము దీవింపఁగ రా రక్కలు సమ్మక్కరొ సా రక్కరొ విశ్వమ్ము నింక రక్షింపంగన్	7.