పితృదేవ స్మరణము

పితృదేవ స్మరణము

(శ్రీ పోచిరాజు పేర్రాజు నామధేయ సంకీర్తనము)

 

శా.	శ్రీ లక్ష్మీ సతి నాథు కూర్మిసుత సచ్ఛీ లాన్వ యాంభోధికిం ద్రైలోక్యాధిపుఁడై వెలుంగు హరు మూర్ధావాసునిం బోలుచున్ మేలౌ కౌశిక గోత్రుఁడై బుధ జనా మేయాభిమానుండునై  వేలా హీనము పోచిరాజ వనధిన్ వెల్గొందె పేర్రాజనన్	1.
కం.	కరివరద పదస్మృతి త త్పరమతి విమల గుణధామ పావన పేర్రా జ రుచిర నామమున వెలుఁగు విరాజమాన సురభరిత పితృలోకమునన్	2.
మ.	తరణార్థంబు భవాబ్ధి వ్రాసితివి గీతాసార భాష్యమ్మునున్ విరియం జేసితి పుష్ప సంచయము సావిత్రీ కథాగమ్మునం బర భాషామృత భాండ మిచ్చితివి వప్తా సంయమీంద్రత్వమున్ వరమై యొప్పగ నిన్ను గొల్చెదము నీ పాదద్వయం బానుచున్	3.
మ.	నర వంద్యోత్తమ సేద దీరితి శివానందద్రుమచ్ఛాయలన్ దరిఁ జేరంగఁ దలంచి వింటి వట సత్యానంద సద్బోధలం బరమానందము నొందవే రమణ దేవజ్యోత్స్నధామంబునన్ సరి లేరెవ్వరు నీకుఁ దండ్రి యిల సంసారంపు సన్యాసివే	4.
ఉ.	మాన ధనుండు గ్రామ జన మండిత తత్త్వ విశోధకుండు స త్సూనృత గీతసార పరిశోధిత  మానస భాసమానుఁడున్ మానిత వేద సూక్త పరిమాణ మహోదయ కావ్య రాజ సం ధానుఁడు సత్యవంత వర దార చరిత్ర మనంగ ధాత్రినిన్	5.
శా.	సత్యాధ్యాత్మిక చింతనా కలిత భాస్వద్జ్ఞాన సంభావ్యుఁడున్ నిత్యోద్దీపిత పద్య కీర్తిత మహానీలాంగ విష్ణుండు నౌ న్నత్యభ్రాజిత వర్తనుండు స్వపురీ నాథత్వ ధౌరేయుఁ డా రాత్యామ్నాయ విహీనునిం గొలుతుఁ బేర్రాజాఖ్య విఖ్యాతునిన్	6.
ఉ.	దొడ్డవరంబు నాఁ బరఁగు దొడ్డ పురమ్ము సలీలఁ గాచి తీ వడ్డము లేని చందమున వ్యర్థపుఁ బల్కుల సంహరించుచున్ దుడ్డున కీక విస్తరము దోరపు గడ్డగు కాల మందునన్ గొడ్డము లెన్ని వచ్చినను గుండె దిటమ్మున నుంటి విద్ధరన్	7.
ఉ.	ఫల్గు దురంత కార్యచయ భంజన! చిత్తము నందు స్వార్థమే కల్గ నెఱుంగ వీ వెపుడుఁ గామ మదోద్ధృత ఖాండ వాటవీ ఫల్గుణ! బంధు మిత్ర జన వర్గ సమంచిత పూజ్య పూరుషా! వెల్గితి వీవు దొడ్డవర వీర్య జనప్రవ రాధి నేతవై	8.
మ.	శత వర్షంబులు గాంచఁ జాగినను మా స్వాంతమ్ము లందుండు నీ దు తలంపుల్ నెఱి నింపుఁ జిత్తముల సంతోషామృతద్రోణి నీ వితతస్ఫూర్తి వచో నికాయ మొసఁగున్ విజ్ఞాన విత్తమ్ములం బితృలోకాంతర వాస! మమ్ముఁ గరుణన్ వీక్షించి దీవింపుమా!	9.
మ.	జననం బంది సు కౌశి కాన్వయమునన్ సద్బ్రాహ్మణజ్యోత్స్నఁ జి ద్ధన రాజత్కపిలేశ్వరాఖ్య పురి విద్యాశుద్ధ చేతస్కుఁడై మనమం దెన్నఁడు విష్ణు నామ రతి నే మాత్రమ్ము క్షీణింప నే రని వృత్తమ్మున గ్రామపాలకుఁడు బేర్రాజాఖ్య జీవించెనే	10.
మ.	చిరకాలమ్ము సనాతనార్ష గుణ సంశ్లేషైక సన్మానసుం   బర మార్థాతత శోధనార్థ పరితప్తస్వాంత సంచారినిన్   గురు సేవానుగ తాఖిలాంచిత మహా గుప్తార్థ విజ్ఞానినిన్ దరహాసాస్య విరాజమాన జనకున్ ధాతాభునిం దల్చెదన్	11.
శా.	శ్రీకృష్ణార్పిత నిర్మ లాతిశయ చిచ్చేతో మహాంభోధికిన్ రాకా పూర్ణ సుధాకరుండ వయి భార్యా పుత్ర బంధమ్ముతో నేకాంతస్థిర భావ మగ్నుఁడవు విశ్వేశున్ మదిన్ నిల్పి ని త్యైకాగ్రస్ఫుట రక్తి నుంటి విట సత్యాకాంక్షఁ దండ్రీ మహిన్	12.
మ.	భగవద్జ్ఞాన వికాస సంభరిత సుస్వాం తారవిందప్రభా! విగ తాంతర్గత వైరి షడ్గణ! మహా వేదాంత విద్యా ప్రవీ ణ గరిష్ఠా! విమ లాంతరంగ! నుత కృష్ణస్తోత్ర పారాయణా! సుగుణభ్రాజిత పోచిరాజ కుల సుశ్లోకైక రత్నాంకురా!	13.
మ.	కమనీ యోజ్జ్వల సద్గు ణావృత లసత్కారుణ్య పాథోనిధీ! విమ లాంతఃకరణప్రదీప్త చరితా! వేదాంత విద్యోన్నతా! రమణీ యామల పోచిరాజ కుల పారావార తారాధిపా! కొమరుం డింపుగ నీయ భక్తిమెయిఁ గైకొమ్మా నమో వాక్కులన్	14.
శా.	జ్యేష్ఠాత్మోద్భవ నల్లు నింకను ద్వితీయేద్ధాత్మజన్ భర్తనున్ శ్రేష్ఠుండైన కనిష్ఠు నల్లుఁ దమి సచ్ఛీలుం జతుర్థున్ లస త్కాష్ఠాంగార విరాజమానునిగ నాకర్షించితే యల్లునిన్    నిష్ఠం దండ్రి స్నుషన్ ద్వితీయ నణఁపన్నిత్యేహ కష్టమ్ములన్	15.
ఉ.	సాత్యవతేయు భంగి నిల సాత్యవతేయుఁడ వీవు నెన్నఁగా సత్య గవేషణా రతిని సంతత ముంటివి నిశ్చలమ్ముగాఁ గృత్యము లందుఁ గ్రుంగక స్వకీయ మనమ్మును నిల్పి చేసితే యత్యయ పంక్తి నో జనక యార్తి వహింపక యోర్చి వెల్గితే	16.