పద్యాలు జనవరి 2017

తరతమములు వలదు మనకు
కర మనురతి మన మలరెడు కవన సుమములన్
సురుచిర గతుల ననవరత
పరవశమున మెలగిన నురు వరమగు నధిపా!                                                                     5

సత్యభామ విలాపము:
గురుతర దినకర కర నిభ
ఖరావలోకన గిరిధర కర కమలగ్రా
హి రమాత్త పారిజా తా
మర వర కుసుమ పరితప్త మానస కుమిలెన్                                                                          4

భూజంపు మూలమ్మునఁ బొర్లు వారల్
పాజమ్ము పాణిద్వయ వర్జి తాత్ముల్
బ్రాజిల్లు సంపత్తిని పారి భంగిం
బైజార్చు కౌపీనులె భాగ్యవంతుల్                                                                                           3
[పాజము = భోజనము; పారి = మన్ను]

ఆంగ్ల మానపు సంవత్సరాది వచ్చె
పూర్వ వత్సర వేదన లుర్విఁ దలగు
రెండు వేల పయి పదియే డుండు నిపుడు
నూత్న వర్షమ్ము కడిగిన రత్న మనగ                                                                                     2

మొదట సమమ్మునకు నెలలు
పదియే మార్చి యొకటి యయె వర్షాది యటన్
పిదప పెరిగె రెండు నెలలు
తదుపరి జనవరి యొకటియ తథ్యంబయ్యెన్                                                                            1