శివ స్తుతి
(ప్రణీతము: పోచిరాజు కామేశ్వర రావు.)
దంభంబు విడిచి నే సం
రంభంబున వేడుకొందు రాజమకుటునిన్
గంభీర గరళ కంఠున్
శంభుఁ ద్రినేత్రు గిరిజేశుశంకరు నీశున్ 1
దంభము వీడి నేఁ గొలుతు దానవ ఖండన ఖేలనాతి సం
రంభుని, దక్షయజ్ఞ పరి రక్షణ శిక్షణహేతు భూతునిన్
స్తంభిత జాహ్నవిన్ , వికట దండధ రోద్ధత దర్పహంతకున్
శంభుని, ఫాల నేత్ర తట సంజని తానల దగ్ధ మన్మథున్ 2
శంభుఁ డిందు మౌలి శంకరుఁ డీశుండు
నీలకంఠుఁ డసమ నేత్రుఁ డజుఁడు
త్రిపుర వైరి శివుఁడు దేవ దేవుండు కు
మార జనకుఁ దలఁతు మార వైరి. 3
వందన మాచరింతు మదిఁ బర్వత రాజ తనూజ భర్తకుం
జందన భస్మ గంధ పరి సర్పిత గాత్రుఁడు చంద్ర మౌళికిన్
నందిత భృంగి శృంగి వర నంది పిశాచ గణాధి నేతకున్
సుందర ఫాల నేత్ర పరిశోభిత వక్త్ర పినాక పాణికిన్. 4
శ్రీశైలాగ్ర తటీ స్థ పుణ్యజన సంసేవ్యుండు మల్లన్ననుం
గాశీక్షేత్ర విరాజితున్ శివుని ద్రాక్షారామ భీమేశ్వరున్
రాశీభూత దయా పయోనిధిని సద్రామేశ్వ రాఖ్యున్ భవా
నీశానీ కర పూజి తాంఘ్రియుగ దేవేశున్ భవున్ వేడెదన్ 5
హరహర! మహా సురా! హిమ
గిరివరవాస! నటరాజ! గిరిజానాథా!
పుర త్రయ హరా! దయాకర!
సురాపగా జూట ధీర! సుందర! ప్రణతుల్ 6
మూర్ధ విరాజిత సోమున్
దుర్ధర్షాభీల గరళ దోషిత గళు నా
యర్థేశ సఖుఁ దలఁతు వా
మార్ధ స్థిత శైలసుత నుమాశంకరునిన్ 7
ఆకాశ గంగకు హద్దులు సూపించి నడినెత్తి నుంచిన జడల ఱేఁడు
నగరాజ కన్యకు సగభాగ మిచ్చిన యర్ధ నారీశ్వరుం డంద గాఁడు
గజ దైత్యు కోరిక కరుణించి తీర్చిన జగ దభి నుత గజ చర్మ ధారి
శరణాగతుండు శశాంకుఁ గాచిన మేటి సౌజన్య మూర్తి యా చంద్రమౌళి
గరళమును మ్రింగి జగములఁ గరుణఁ గాచె
హద్దు లవి లేవు వరముల పద్దు లందు
దుష్టుఁ డైనఁ గాచు పొగడ్త నిష్టుఁ డైన
హరుని గుణముల నెంచఁగఁ దరమె జగతి 8
హరి వాగీశాదిగ సుర
వర గణ సేవిత వధువును వరునిం గనుఁడీ
దురితౌఘ హరము ఘన శుభ
కరమ్ము గిరిజా పురహర కళ్యాణ మిలన్ 9
ఇల్లరికపు టల్లుఁడు మఱి
మల్లుం డట వల్లకాటి మదనాంతకుఁడే
విల్లంది పుర త్రయముం
దల్లడిల మరల్చె యమ సదనమునకు సెలన్ 10
వసంతతిలకము:
విశ్వేశ్వరుం బ్రమథ వీర గణాధినేతన్
శశ్వద్వరప్రదుని శంకరు సాంబమూర్తిన్
విశ్వాత్ము భా గసమ వీక్షణు నీలకంఠున్
సుశ్వేత శైలతట శూలినిఁ గొల్తు భక్తిన్ 11
పరమోత్కృష్ట విలాస తాండవ సనిస్వానాద్రి సంచారముల్
గిరి కన్యా కర సారసద్వయ సు సంకీర్ణప్రకాశమ్ములున్
శర ణాకాంక్షిత మౌని హృద్విపిన సంచారంపు శీతాంశు శే
ఖర పాదమ్ముల సేవ మానవులకున్ గళ్యాణముల్ గూర్చుతన్ 12
కైలాసాగమ నిత్య నర్తన లసత్కాత్యాయనీ కేళి లీ
లాలో లాది వినోద తోషిత మనోల్లాసప్రభా విగ్రహా!
కాలాలోకన దగ్ధ మన్మథ! పురాకా రాసురఘ్నా! శివా!
ప్రాలేయాంశు విరాజమాన వర మూర్ధా! శంకరా! కావవే 13
మానిని.
రుద్రుఁడ వీవని రోషుఁడ వంచు విరోధు లనంగ విరుద్ధ మయా
యద్రి సుతార్చిత! యంగభవారి! మహాక్షయ కారక హాలహ లా
భద్ర వినాశక! పన్నగ భూషణ! బ్రహ్మ సురార్చిత! పాపహరా!
భద్ర మొసంగుమ పన్నుగ మాకిల భక్త వశంకర! పంచముఖా! 14.
మానిని.
ఈధర నందున నింపుగ లోకుల నెల్లరఁ బ్రోవు మహేశ నభో
వీధి విహారివి వేమరు గొల్తును విశ్వవిధాయక! పింగళ! నీ
గాధలు గాంచ యగాధము లయ్య వికారము గల్గె నఖర్వము నా
బాధలు దీర్చి కృపానిధి! కావవె భక్త వశంకర! పంచముఖా! 15.
మానిని.
నిర్జర సంచయ నిత్య సమార్చిత నిర్గుణ భాసిత నీలగళా
దుర్జయ దోర్బల దుష్టపురత్రయ దుస్స్థితి కారక దుఃఖహరా
దుర్జన మానస దోషగుణాంతక ధూర్జటి నామక దుర్గ ధవా
భర్జిత తర్జిత పామర రక్షక భక్త వశంకర! పంచముఖా! 16.
దైవ గణార్చిత దండధ రావన దైత్యవ రాధిప దర్ప హరా
గ్రీవ విషంధర కీలి విలోచన కీర్తిత రాజత గేహ శివా
భావజ విగ్రహ భర్జన భాసిత పన్నగ భూషణ పాప హరా
పావన మూర్ధ నివాసిత వాహిని భక్త వశంకర! పంచముఖా! 17
శైల నివాస విషఘ్న విశారద శైల సుతార్చిత సాంబశివా
కాల విరోధక కామ వినాశక కామిత దాయక కాలగళా
శూల వరాయుధ సూరి జనావన సుక్రతు నామక శూర వరా
ఫాల సులోచన భైరవ దండము భక్త వశంకర! పంచముఖా! 18
మానిని.
నీ దగు పాదము నెత్తిని నుంచుచు నిత్యము గొల్తును నిక్కముగా
నీ దగు మూర్తిని నెమ్మదిఁ గైకొని నెమ్మినిఁ గాంచుదు నిక్కముగా
నీ దయఁ గోరుచు నేనిల భక్తిని నిన్నె దలంతును నిక్కముగా
వాదన లేలయ భారము నీదయ భక్త వశంకర పంచముఖా 19.
కవిరాజ విరాజితము.
కర మనురక్తినిఁ గావుమ శంకర కాలుని బాధలు ఖండములై
పరఁగెడు రీతినిఁ బన్నుగఁ గొల్తును భక్తిని నిన్నిఁక భస్మతనూ
గురువుగ నెంచితిఁ గూర్మి వహింపుము గోపతి నాపయిఁ గొండ దొరా
పరువపు భాగ్యపు వాపును బాపుమ భక్త వశంకర పంచముఖా 20.
కవిరాజ విరాజితము.
కలవర మొందితిఁ గష్టపుఁ దోయధిఁ గానక త్రోవను గామహరా
విలవిల లాడితి వేగమ కావవె భీషణ! భక్తుని విశ్వపతీ
చలిమలచూలికిఁ జక్కటి భర్తవు సన్మతి నీయవె చంద్రధరా
వల దిఁక నాకిట బంధపుఁ బాశము భక్త వశంకర పంచముఖా 21.
కవిరాజ విరాజితము.
ననుదయఁ జూడుమ నంది సువాహన నాట్యవిహార యనాథ ధవా
మనమున నిన్న యుమాపతి నమ్మితి మంచుమ నన్నిఁక మంచిగ నే
ననయము చిక్కితి నాపద లందున నాత్మను నిల్పితి నంబపతీ
పనిగొని కొందఱు బాధల నిత్తురు భక్త వశంకర పంచముఖా 22.
కవిరాజ విరాజితము.
సగ తను వందున సత్సతి నుంచితి చక్కఁగ నిత్యము సాంబశివా
మగువను గంగను మానుగ నెత్తిని మాతను నుంచితి మారహరా
వగలను మాన్పుమ భక్తుఁడ నైతిని పన్నుగ నీకిలఁ బాంశుధరా
పగలను వీడితి వైరుల యందున భక్త వశంకర పంచముఖా 23.
ప్రేత భూ సంచారి రిక్తాంబరుండు త్రినేత్రుండు వరదుండు నిత్య శుభుఁడు
భస్మ చందన దేహి ఫణివృత బాహుండు శీతాంశు జాహ్నవీ శేఖరుండు
నలి జటాజూటుండు నమరారి బంధుండు నత నిర్జర గణుండు సిత తనుండు
నట నానురాగుండు పటు విషగ్రీవుండు నాదిభిక్షుం డభయ ప్రదుండు
ప్రమథ నిచయ భూతప్రేత పాలకుండు
నస్థి మాలి కర కపాలసుస్థిరుండు
నశుభ దృశ్య మాన నిరంతర శుభ దాయ
కుండు నా విశ్వనాథుని రండు కొలువ 24
విద్వన్మండల హృత్సరోజ విలసద్విఖ్యాత కీర్త్యంగనా
చిద్వైచిత్ర్య తనూ విలాస కరు ణాశ్లిష్టాత్మ భక్తాళి రా
జద్వైశిష్ట్య గుణోత్క రాగుణ గణ క్షామాంతరంగ ప్రభా
యుద్విగ్నార్త జనావ నైక రత సద్యోరక్ష శూలీ నతుల్ 25
దుర్వారాసమ నేత్ర సంజనిత సద్యో వహ్ని భస్మాంగజా
గర్వోద్రిక్త పురత్రయాసుర మహాకాయాసు విధ్వంసకా
నిర్వీర్యీ కృత కాలకూటవిష సన్నిక్షిప్త కంఠప్రభా
శర్వా శంకర పార్వతీధవ హరా శాంతించి కాపాడుమా 26
ఫణిభూషణ! శివ! విష మే
క్షణ! గగనాంబర! మనో వికాసిత కాంతా
మణి భాసిత వామాంగ! క
రుణా విలోకన! స శశి శిరో గత గంగా! 27
ఛన్న సధగద్ధగద్జ్వల
సన్నిట లాంబక! ధిమిధిమి చయ నిర్ఘోషాం
చన్నటనాంఘ్రిద్వయ! విల
సన్నాగాభరణ కంఠ! సర్వజ్ఞ! నతుల్ 28
ఫాలాంతర్గత నేత్ర కీర్ణ సుమహాజ్వాలా విధగ్ధాంగజా!
నీలగ్రీవ విరాజమాన! విలసన్నృత్యప్రియై కాత్మ! లో
కాలోకాలి వివర్ధితాంగ! రహితాద్యంతప్రభా వైభవా!
వేలాక్రాంత దయారసార్ణవ! హరా! విశ్వేశ! రక్షింపుమా 29
నీల గళమ్ము నీల రమణీయ నభస్స్థల సన్నిభమ్ము గా
ఫాల తలమ్ము సుజ్వలిత భాస్కర మండల దీప్తిమంతమై
చేల వరమ్ము కుంజర వశీకృత మానస దర్శనమ్ము గాఁ
గాల ఫణీంద్ర భూషణ! జగమ్ముల వెల్గెడు నీకు మ్రొక్కెదన్ 30
దొడ్డవరాన బిడ్డలను దొడ్డ మనమ్మున గడ్డుకాలమం
దడ్డము లడ్డగించి యల యడ్డ మెఱుంగని యెడ్డు నెక్కి నీ
వెడ్డెము లెన్ని పడ్డఁ బయి నింపుగ వడ్డన సేసి దుడ్డులన్
గొడ్డుఁదనమ్ము వాపి మఱి గుడ్డ లొసంగి గిరీశ! కావవే 31
కామెంట్లు లేవు:
కామెంట్ను పోస్ట్ చేయండి