శ్రీ గణేశాయ నమః
సకల క్ష్మాజన సంత తాదిమ వ రార్చా పాత్రు విఘ్నేశ్వరున్
సక లాదిత్య గణార్చనీయ ఘన రక్షా దక్షు హేరంబునిన్
సక లాటంక మహీరు హోత్కర లతా స్తంబఘ్ను ద్వైమాతురున్
సక లా ఘాగమ కోటి వజ్రు గొలుతున్ సద్భక్తి హస్త్యాననున్ 15
విఘ్నాధిపత్య ధుర్యా !
విఘ్నచ్ఛేదన నితాంత విద్యా! భక్తో
పఘ్నా! భవ సంచిత పా
పఘ్నా! భగ్నైక దంత! భవకాయఘ్నా 14
కరిమూర్ధా! శివవక్త్రా!
హరి వరయజ్ఙోపవీత! హత విఘ్నాలీ!
వర మూషికేంద్ర వాహన!
గిరిజా హస్తాబ్జ భూత! గేయస్తుత్యా! 13
శశ్వత్కృ తాఘ హర! వి
శ్వేశ్వర కర దత్త మూర్థ! హేరాంబా! నా
నైశ్వర్య దాంతరాయ
ఘ్నేశ్వర! రక్షింపు మయ్య యిభ వక్త్రాంకా! 12
విఘ్నారణ్య కుఠార! భక్తజన దుర్భే దావనీ వాస పా
పఘ్నా! నిర్జర పూజితాంఘ్రి యుగ! దుర్వా రోగ్ర దుర్దాంత శ
త్రుఘ్నోదార దయా రసామృత మహోత్తుంగాత్మ! షడ్వక్త్ర గ
ర్వఘ్నా! విఘ్నపతీ! నుతింతు నిను గాపాడంగ రావే దయన్ 11
కైలాస గిరిలోన కమనీయ కాత్యాయనీ సతీ కల్పిత నియమ బద్ధుఁ
గర్తవ్య దీక్షా విగత శీర్షుఁ గరుణార్ద్ర పురహర కల్పిత కరి వరాస్యు
బ్రహ్మాది నిర్జర వ్రాత సంకల్పిత భీకర దుస్సహ విఘ్ననాథు
మోదక ఖాదన మోద విహారు విభాసిత మూషిక వాహన వరు
సురనదీ సతీ సుశోభిత నందను
మాన్య నాగ సూత్రు మంద హాసు
భవ్య శూర్పకర్ణు వర కుమార గురువు
నిత్య మేను గొల్తు భృత్యు భంగి 10
వ కార నిషిద్ధము:
అంతరాయమ్ముల నన్నింటి మరల మరల నాపు నిన్నేను గొలిచి కొలిచి
యాద్యంతములు లేని హృద్యంపు నీరూపు లలర నలర మదిఁ దలఁచి తలఁచి
యాగ మోక్తములైన యద్భుతాఖ్యలఁ దనియ తనియ నేరక యఱచి యఱచి
తొండ మేక రదము తోరపు బొజ్జయు చోద్యము చోద్యము సూచి చూచి
మూషిక రథముఁ గని కని మురిసి మురిసి
కుడుము లమర నమరఁ గాంచి కులికి కులికి
దినము దిన మేను నుతియింతుఁ దేఱఁ దేఱ
బొజ్జ గణపయ్య రక్షించు మూరి మూరి 9
పర్వత రాజసు తాత్మజ
సర్వ ప్రత్యూహ హరణ సన్నుత దేవా
యుర్వీ జన నిత్యార్చిత
దుర్వార గణాధినేత తొలుతను గొలుతున్ 8
ఆటంకపు గమి కడిదమ!
పాటవ జిత కార్తికేయ! వారణ వదనా!
ఘోటక మూషిక! నిర్జర
కోటి వినుత పాదపద్మ! కోటి ప్రణతుల్ 7
ఉరువిఘ్న వినాశక! శుభ
కర! వక్రకర! శశివర్ణ! కాకోదర సూ
త్ర! రజత నగాధిపాత్మజ!
కరుణాంతఃకరణ! మమ్ము గావఁగ రావే 6
కైలాసంబున నుండి భూగతి సుసౌకర్యంబునం జేసితే
ఫాలాక్షభ్రమణక్రియా రతుఁడవై పాపఘ్న! విఘ్నేశ్వరా!
లీలానింద్య వరోందు రాంగన! సుకాళింగాస్య! లంబోదరా!
శైలేంద్రాత్మజ నందనా! శరణయా సర్వామ రైకాధిపా! 5
[ఉందురము = ఎలుక; అంగనము = వాహనము; కాళింగాస్య = ఏనుగు
ముఖము కలవాడు ]
ధవళాంబర ధరుని సకల
భువనవ్యాపి శశివర్ణు భుజ చత్వారిన్
సువికసిత ప్రసన్న వదను
ని విఘ్న రాహితికి మదిని నిత్యము దలఁతున్ 4
వినయాంజలి నే దలఁతున్
వినాయకుని వక్రతుండు విఘ్నేశ్వరునిన్
మునిగణ సేవితు హరసుతు
ఘన మోదక హస్తు మూషిక రథ విలసితున్ 3
మూషిక వాహనంబు నట మోదక పాణివియై యపార సం
తోషము పైఁగొనన్నడువ దుష్టుఁడు సోముఁడు జూచి నవ్వఁగన్
దోషికి శాప మీయఁగను దుష్టుఁడ వైతివి విఘ్నభీరు న
న్శోషుని గావు మయ్య మది సూక్తుల గొల్తును విఘ్ననాయకా 2
హరసుత గజశిర లంబో
దర విఘ్నేశ్వర నగసుత దనయ దురిత సం
హర మూషిక వాహన సుర
వర సన్నుత గై కొనుమివె వందన శతముల్ 1
కామెంట్లు లేవు:
కామెంట్ను పోస్ట్ చేయండి