అభినందన మాల

 అభినందన మాల 

	వేద వాఙ్మయ కృషీవలుఁ డాచార్య మఱ్ఱి క్రిష్ణారెడ్డి.
చం.	విదితము నీదు వాఙ్మయము విశ్వ జనాళికి విస్తృతమ్ముగా హృదయ వికాస కారక  సహేతు పదాన్విత భాసితం బిలన్ సదుచిత వేద భాష్య చయ సాధక! సాత్యవతేయ సన్నిభా! సదమల కృష్ణ నామ విలసన్నుత మఱ్ఱి కులైక రత్నమా!	1.
చం.	మృదు మధు రామృతాన్విత సమీరిత భాషణ దివ్య భూషణా వదన వికాస దీప్త సు విభాసిత గాత్ర విలాస పూరుషా సదుచిత వేద భాష్య చయ సాధక! సాత్యవతేయ సన్నిభా! సదమల కృష్ణ నామ విలసన్నుత మఱ్ఱి కులైక రత్నమా!	2.
ఉ.	ఆదరణీయ జీవితము నద్భుత రీతినిఁ బొంది తింపుగాఁ   బేదరికమ్ము గాంచ మిల విద్యల కంచును జాటి చెప్పితే వేదము లందుఁ జూపితివి విస్తృత భక్తి ననన్య రీతినిన్ సాదర మొప్ప నిం దలఁతు  సన్నుత మఱ్ఱి కులైక రత్నమా!	3.
చం.	పటుతర విద్యలం బడసి భావన సేయక కృచ్ఛ్ర రాశినిన్ వటు వయి వేద విద్యలను బన్నుగ నేర్చి గురుస్తవమ్మునన్ దిటవుగ నీ కుటుంబమును దీరుగ దిద్ది సరాగ పద్ధతిన్ వట తరు భంగిఁ బెంచితివి వంశము మఱ్ఱి కులైక రత్నమా!	4.
ఉ.	చెన్నుగ శ్రీమఠ ప్రవర శ్రీ బస వేశుని సంశ్రయమ్మునం బన్నుగ సంస్కృతాధ్యయన పాఠము లభ్యసనమ్ము సేసి యా సన్న వరప్రదుండు నిజ సద్గురుఁ డీయఁగ దేవ భాషనున్ సన్నుత విశ్వనాథు కడ శబ్దము నేర్చితి మఱ్ఱి రత్నమా!   [బసవేశుఁడు = బసవరాజస్వామి; వరప్రదుఁడు = వరదాచార్యులు; విశ్వనాథుఁడు = విశ్వనాథ శర్మ]	5.
ఉ.	వేదము లిద్ధరన్ శ్రుతుల పేరఁ జెలంగెను దాఱుమాఱుగన్ వేదము లుద్ధరింపఁబడె వెన్నుని చేతఁ బురాతనమ్మునన్ వేదము లెల్లఁ గూర్చఁబడె వేద విదుం డగు వ్యాసు చేతనున్ వేదము వ్రాసి తాంధ్రమున విజ్ఞుఁడ మఱ్ఱి కులైక రత్నమా!	6.
ఉ.	వేద చతుష్ట యాంతర విభిన్న మహోన్నత మంత్ర పంక్తినిన్ స్వేద విహీన లీలఁగఁ బవిత్ర పుటమ్ములు నాల్గు వేలలోఁ బాదుకొనంగఁ జేసితివి పండిత పామరు లెల్ల మెచ్చఁగా  వేద విదుండవై సతము వెల్గెదు మఱ్ఱి కులైక రత్నమా!	7.
చం.	పదపడి నాల్గు వేదముల భాష్యము నాంధ్రము నందు వ్రాసితే యదరక ద్వాదశ ద్వయ సహస్ర పుటమ్ముల నింపి యింపుగం బదునగు యౌవనమ్ముననె పాత్రత నెంచఁగ శంక రాభమై  చదువుల తల్లి నిన్ను గనె సద్దయ మఱ్ఱి కులైక రత్నమా!	8.
ఉ.	వారని భక్తిఁ గొల్చితివి పన్నుగ నీ విల వేద మాతనుం గారణ జన్మ మందితివి కైటభ మర్దనుఁ డిచ్చు గావుతం బార మెఱుంగ నేరని యపార కృపారస వీక్షణమ్ములన్ భారత దేశ రత్నముగ భాసిలు మఱ్ఱి కులైక రత్నమా!	9.