శ్రీ యశస్వినీ శతకము.

శ్రీ యశస్వినీ శతకము.

పద్యదశకము.

(ప్రణీతము: పోచిరాజు కామేశ్వర రావు)

 

 

	విశ్వ రక్షణమునకై శ్రీలలితా దేవిని, దేవి మహిమము తక్క యన్య శరణ్యము లేదని యెంచి, యా మహిమము చూపు మని వేఁడుకొనుట.
ఉ.	శ్రీయుత మాన వేంద్రులకుఁ జెల్లును మత్తున నేమి చేసినం గాయము వంచి కష్ట పడు కార్మిక కోటికిఁ గడ్పు మంటయే ప్రాయ మడంగి నట్టి జన వర్గపుఁ బాటులు మిక్కుటమ్ములే న్యాయమె చూపుమీ మహిమ నందిత మేదిని!  శ్రీయశస్వినీ!	1.
ఉ.	నీతి విహీనమై కర మనీతి సెలంగె దురాశలే  మనః ప్రీతి నొసంగఁ జాగె నిరపేక్షము ధర్మము నందు హెచ్చిలెం   జూత మనంగ మానవత శూన్యము భారత మందు నిత్తఱిన్ మాతరొ చూపుమీ మహిమ మంగళ దాయిని! శ్రీయశస్వినీ!	2.
ఉ.	వంచన నిత్య కృత్య మయి పండిత పామర భేద హీనమై   మించెను భూతలమ్మునను మృగ్యము నిక్కపు టార్జవం బిఁకన్   సంచులు నింప విత్తముల సర్వులు వొందిరి నైపుణమ్ము వీ క్షించుచు చూపుమీ మహిమ శ్రీకరి! శాంకరి! శ్రీయశస్వినీ!	3.
చం.	నరులకు నెల్ల నక్కట సనాతన ధర్మము రోఁత యయ్యెనే పరఁగెను స్వేచ్ఛ మిక్కుటము పశ్చిమ సంస్కృతి భంగి నెల్లెడన్ గురువుల పైన నాదరము గూలె సమూలము స్వార్థ చింతలం గరుణను జూపుమీ మహిమ కాలిక! కేవల! శ్రీయశస్వినీ!	4.
ఉ.	నారుల పైన గౌరవము నాశన మయ్యెను భూతలమ్మునన్ వారికి లేదు రక్షణము భైరవ కాముక కోటి కృత్యముల్  మూర నవారితమ్ముగ నపూర్వపు రీతిని సంతతమ్మునున్ వారక చూపుమీ మహిమ భైరవి! శాంభవి! శ్రీయశస్వినీ!	5.
ఉ.	మూర్తుల నిల్పి భక్తుల సమూహము నుండి హరించి కాసులన్ నేర్తు రుపన్యసింపఁగ ననేక విధమ్ముల భక్తి బోధలే  యార్తుల నన్న హీనుల నిరాదరణమ్మున గాంత్రు సంతతం బార్తినిఁ జూపుమీ మహిమ నమ్మరొ రంజని! శ్రీయశస్వినీ!	6.
ఉ.	నేర్చిరి పెక్కు శాస్త్రములు నేర్చిరి వింతగ విశ్వజాలముల్ గూర్చిరి గోళ యానములు గూర్చిరి దేశ సమూహ సంస్థలం  గూర్చిరి మార ణాయుధ నిగూఢ బలమ్ములఁ గైతవమ్మునం బేర్చుచుఁ జూపుమీ మహిమ విశ్వవినోదిని! శ్రీయశస్వినీ!	7.
చం.	మతములు సంక్రమించినవి మానవ జాతికి వేఱు వేఱుగా నితనికి దైవ మాతని కనిష్టుఁడ యాతని వేల్పు వీనికిన్  సతతము భేద భావముల శాంతి వినాశము గాఁగఁ బోరులన్  వితతిగఁ జూపుమీ మహిమఁ బేరిమి బ్రాహ్మణి! శ్రీయశస్వినీ!	8.
చం.	విలువలు సన్నగిల్లినవి విద్యల నీర్ష్యలు ప్రజ్వలించెనే చెలఁగెను గక్ష లాటలను జిత్ర విచిత్ర విధమ్ములన్ ధరన్ మలినము లయ్యె లోకమున మానసముల్  నర కోటి కక్కటా వలపునఁ జూపుమీ మహిమ పన్నుగఁ బార్వతి! శ్రీయశస్వినీ!	9.
ఉ.	సత్యము కాన రా దిల నసత్యము నిచ్చలు పిచ్చలించెనే యత్యయ మెల్ల తావుల విహారము సేయఁ దొడంగె మిక్కిలిన్ నృత్యము లాడు నిత్యమును నేరము లిచ్చట కుప్ప కుప్పలై స్తుత్యము సూపుమీ మహిమ తోరము ధర్మిణి! శ్రీయశస్వినీ!	10.